6 vite burgim për policin që abuzoi seksualisht me një të mitur në Kamenicë

Zyrtari policor Remzi Shillova është dënuar sot me 6 vite burgim nga Gjykata Themelore në Gjilan, pasi i njëjti akuzohej për sulm seksual ndaj një të miture, 15 vjeçare, në Kamenicë.

Lajmin e ka konfirmuar për Gazetën Online “Reporteri.net”, Sabit Shkodra, i cili është zëdhënës i Gjykatës Themelore në Gjilan.

“Gjykata Themelore në Gjilan e ka shpallur aktgjykimin akuzues ndaj zyrtarit policore për veprën penale ‘sulm seksual’,. Ai është dënuar me gjashtë (6) vjet burgim. Palët kanë të drejtë ankese”, tha Shkodra.

Polici Shillova ishte arrestuar në prill të këtij viti nga Inspektorati Policor i Kosovës nën dyshimin se kishte abuzuar seksualisht me një 15 vjeçare me probleme mentale.

Që nga muaji Nëntor 2020 deri më 20 Prill 2021, i pandehuri R.SH., ka ushtruar sulm seksual ndaj viktimës së mitur nën moshën 16 vjeç.

Hetuesit e IPK’së në bashkëpunim me Prokurorinë Themelore të Gjilanit, dhe me leje të Gjykatës patën hetuar policin duke aplikuar masat e fshehta.