Miniera, fabrika, hotele e shtëpi, çfarë asetesh do t’i barten Fondit Sovran të shumëpërmendur nga Kurti

HomeLajme

Miniera, fabrika, hotele e shtëpi, çfarë asetesh do t’i barten Fondit Sovran të shumëpërmendur nga Kurti

Më shumë se gjysma e aseteve që aktualisht janë në pronësi të Agjencisë Kosovare të Privatizimit mund t’i kalojnë Fondit Sovran. Lista ende nuk është

Vuçiq: Serbia s’është as s’do të jetë ne luftë, do ta ruajmë paqen
Sveçla: Qytetarët mund të marrin leje të përkohshme qëndrimi në Shqipëri për pesë vite
Mushkolaj tallet me ministren: Ndalohet përplasja e fëmijëve në veturën e ministres Hajdari

Më shumë se gjysma e aseteve që aktualisht janë në pronësi të Agjencisë Kosovare të Privatizimit mund t’i kalojnë Fondit Sovran. Lista ende nuk është finalizuar, por nga AKP-ja kanë treguar llojin e aseteve që pritet të jenë tash e tutje në menaxhim të Fondit.

Miniera, ndërtesa administrative, lokale, toka, fabrika, pika të karburanteve, hotele e shtëpi pritet t’i kalojnë nën menaxhim Fondit Sovran.

“AKP ka arritur që t’i evidentojë në një regjistër të përbashkët gjithsej 2364 asete të AKP-së, nga të cilat pas një analize të hollësishme e konkrete është vlerësuar se 84 asete me vlerë dhe 1549 toka në zona të ndryshme kadastrale me rreth 42 mijë hektarë tokë mund të konsiderohen se kanë potencial për t’u bartur në Fondin Sovran.

Bëhet fjalë për asete si miniera, ndërtesa administrative e lokale me apo pa toka, fabrika, hotele, ferma, depo të ndryshme me apo pa tokë, pika të karburanteve, qendra të ndryshme rehabilituese, shtëpi e zyre, toka bujqësore e kështu me rradhë”, thuhet në përgjigjet e AKP’së.

Por në këtë agjenci thonë se lista s’është finalizuar ende. Për këtë deklarojnë se po punojnë me Qeverinë e Kosovës. “Sidoqoftë, AKP dhe Qeveria janë duke i koordinuar veprimet në lidhje me finalizimin e listës së aseteve që mendohet të barten në Fondin Sovran”, kanë deklaruar nga kjo agjenci për “Express”.

Ndryshe, më 26 shkurt të këtij viti, është miratuar në parim Koncept Dokumenti për themelimin e Fondit Sovran.

Kryeministri Albin Kurti kishte deklaruar se ky fond parashikon një transformim të thellë dhe strukturor të qeverisjes ekonomike në Kosovë.

Kurti kishte thënë se interesim për të mbështetur projektin e Fondit Sovran të Republikës së Kosovës kanë shprehur Korporata Ndërkombëtare Financiare (IFC), Banka Botërore, Banka Evropiane për Rindërtim dhe Zhvillim, banka zhvillimoregjermane KfW dhe institucione si Friedrich Ebert Stiftung.